الولد الشقي

هل انا طفل شقي وبعمل شقاوات وازاعيج لماما؟ هحكيلكم على حركاتي وانتو احكمو بنفسكو لان ماما دايما تظلمني وتقول عني شقي
يعني لما الاقي ماما قاعدة قدام الكمبيوتر بتقرا او بتلعب ، واجيب الكورة ارميها على الكيبورد ، ابقى انا شقي؟
طيب لما تكون ماما عاوزة تنام وانا افضل انط فوقها وازغزغها عشان تصحى تلعب معايا ابقى انا شقي؟
ولما اجيب لعبي من اوضة اللعب بتاعتي وارميها ف كل مكان في الشقة ، ماما بتفضل تقولي كدة عيب يا بيكا.. اللعب يا حبيبي مكانها اوضة اللعب .. بس انا بصراحة مبسمعش الكلام.. ابقى انا شقي؟
ماما امبارح نسيت باب اوضة المكتب مفتوح ، وانا استغليت الفرصة وطلعت على كرسي الكمبيوتر وقفشتني وانا بخبط الكيبورد بمفك بابا بيحطه جنب الكمبيوتر.. تفتكروا انا كدة شقي؟
كمان بدخل تحت الترابيزة واستخبى عشان اخض ماما وهي مش لقياني ، وساعات اول ما باب المطبخ يتفتح اجري على جوة اجيب طاسة تيفال وعلب التلاجة وافضل العب بيهم واخبطهم في الارض.. وبرضه ماما تقول عني شقي

واخيرا لما تعملي نعناع وتحطه في الكوباية بتاعتي وانا اعمل نفسي بشربه بس انا في الحقيقة بلعب وادلقه على لبسي وماما تضطر تغيرلي عشان مبردش.. بصراحة.. انا مش شايف اني شقي خاااااااااااااص.. وانتو.. رايكو ايه؟

أجمل حد في الدنيا

ماما ، أجمل حد في الدنيا ، العيد بتاعها كان من كام يوم ، بس أنا ماكنتش أعرف ، بابا أكيد جاب لها هدية حلوة ، بس أنا ماجبتش حاجة علشان أنا لسه صغير ومش بأعرف أشتري أي حاجة ، بس الهدية بتاعت بابا أكيد هو قال لها إنها بتاعتي، وقدمها لها بإسمي ، أيوة ، أصل بابا دايما بيعمل لي الحاجات إللي مش بأعرف أعملها لسه علشان أنا طفل صغير ، زي أنه يكتب لي البوست ده مثلا ، نرجع بقى لماما ، أنا بأحبها قوي قوي قوي ، هي فاكرة إني بأحب بابا أكتر ، بس في الحقيقة لأ ، أنا صحيح بأتفق مع بابا عليها كتير ، بس ده لأني بأحس إن بيني و بين بابا حاجات مشتركة كتير قوي ، لكن مشاعري من جوة ، ماما فيها نمرة واحد ، وساعات بأتغاظ من بابا جدا لما بأحس إن ماما مهتمه بيه أكتر مني ، هي أول حد بأفكر فيه لما بأفتح عنيا الصبح ، وهي آخر حد بأفكر فيه قبل ما أنام ، وطول الوقت بأحاول أكون جنبها و في حضنها ، ماعدا الوقت بتاع الأكل و الوقت بتاع الدوا ، في الوقتين دول بأهرب منها ، وهي تجري و رايا و تضحك ، آه نسيت ، وكمان وقت البامبرز إحم إحم ، هي بتقول إني مجننها ، بس هي مبسوطة بالشقاوات دي ، المهم إنها مبسوطة ، وأنا فكرت إني أكتب لها البوست ده علشان أقول لها كل سنة و إنتي طيبة يا أحلى و أجمل و أحن أم في الدنيا ، ربنا يخليكي لينا أنا و بابا

مفيش مغامرات النهاردة

وحشتني يا بابا.. انت هتيجي امتى؟ من ساعة ما مشيت وانا نايم.. خايف اصحى احس بغيابك.. بقالك يوم ونص مش موجود.. انا بحب العب كورة معاك اكتر من ماما.. انا بحب ماما بس بحس ان اللعب معاك احلى وله طعم تاني.. وبحب اوي لما ترميني للسقف.. وبحبك اوي لما تحب تشاكس ماما وتغير كلام الاغنية اللي هي بتغنيها معايا ، وبدل

twinkle twinkle little star

تخليها انت

uncle uncle don't cry

وماما تتغاظ وتقولك يا وليد بلاش تعلمه الكلام غلط .. وانت تضحك وتغنيهالي غلط من وراها .. وبحب اقعد جنبك في العربية واربط حزام الامان وانت جايبني من الحضانة .. بحس انك معتبرني راجل وكبير ومن حقي اقعد جنبك.. هتيجي امتى عشان اصحى استناك ؟

يوم ما اتولدت

كنت بتفرج مع بابا على التليفزيون.. نام على كنبة الانتريه قصادي الساعة 12 نص الليل.. فضلت اتامل ف ملامحه زي ما بحب اعمل دايما ، ونقحت عليا الكتابة ليه.. اصلي من وقت للتاني احب اكتبله جواب كاننا اتنين عشاق من بتوع زمان.. احنا فعلا اتنين عشاق بس من بتوع كل زمان.. وانا بكتب في الجواب صحي وقالي انه هيدخل يفرد ضهره على السرير ، قلتله وانا هتفرج على الفيلم الاجنبي واحصلك.. الساعة 1 بعد نص الليل دخلت السرير وانا حاسة بوجع ف ضهري.. كنت متاكدة اني هولد النهاردة مش عارفة ليه.. دخلت نمت كأن واحدة غيري هي اللي بتتالم.. كان لسه نقح مش خبط جامد.. قلت لنفسي يمكن لو نمت وعملت نفسي مش واخدة بالي من الوجع مولدش.. اصلي كنت دايما اقول لبابا اني مش عاوزة اولد ف وقت متاخر عشان هكون اكيد عاوزة انام والوجع والولادة هيمنعوني من النوم.. نمت نوم متقطع واقرب للصحيان منه للنوم والساعة 3 بعد نص الليل مقدرتش استحمل ولا استعبط واعمل كأني مش انا اللي بتوجع.. شفت علامة الولادة.. بكل هدوء كلمت ماما قلتلها.. قالتلي كلمي الدكتورة.. كلمت الدكتورة قالتلي لسه بدري.. قدامك على الاقل لحد 10 الصبح تبقي تروحي المستشفى وانا هحصلك.. دخلت السرير احاول انام بس الوجع مرحمنيش.. ورا بعضه ورا بعضه مش مديني فرصة اخد نفسي.. صحيت بابا وقلتله بكل هدوء: انا بولد.. قام مفزوع .. كلمت الدكتورة تاني وقلتلها الوجع مفيش بينه وبين بعضه غير ثواني.. قالتلي اجري على المستشفى.. كنا في المستشفى 4:30 الصبح.. دخلوني اوضة العمليات على اساس هولد طبيعي.. وصلت الدكتورة وكشفت عليا جوة الاوضة وقالتي لا.. قيصري.. قلتلها اي حاجة بس اخلص من الوجع دا.. كان نازل عليا هدوء غريب وقوة غريبة ف تحمل الالم ، وانا اللي مبستحملش شكة الدبوس.. بس انا فيا حاجة غريبة.. لما بيكون الشيء قدر ومفيش منه مفر بستسلم لقضاء ربنا وانا مؤمنة انه الخير.. ادوني البنج غبت عن الحياة وفقت بردانة والدنيا مهزوزة قدامي ولمحت من بين الضباب وش بابا بيبتسم.. سالته: حبيبي .. الولد عامل ايه؟ قالي : قمر.. قلتله : سليم؟ قالي الحمد لله طفل معافى.. غبت تاني عن الحياة ولما فقت قلت اني عاوزة اشوفه.. جابولي ولد شبه بباه جدا .. قلت ف بالي: ايييييه داااااااااا؟ هي البقعة الحمرا اللي ف مناخيره دي هتفضل كدة على طول ولا ايه؟

وخدت الولد الجميل ف حضني
ولما بصيتله دلوقت بعد ميلاده بسنتين وهورايح ف النوم ف حضني مصدقتش ان الولد الجميل دا ابني .. مصدقتش ان ربنا بيحبني اوي كدة.. حمدت ربنا انه انعم عليا بالذرية وتمنيت تكون ذرية صالحة
الولد الجميل اللي كان ببقعة حمرا ف مناخيره هو انت يا عمري.. والبقعة الحمرا اللي اتولدت بيها راحت.. سنتين عدوا وانت ف حضن ماما وبابا.. انت نور عنينا وابتسامتك هي ضحكة الدنيا لينا.. كل الوجع اللي حسيته ف حملك وولادتك بحس انه تمن قليل اوي ادفعه قصاد طفل جميل زيك.. نظرة عنيك وكلمة ماما عندي بالدنيا.. مش انا بس اللي بديك حب وحنية ودفا.. انت كمان من غير ما تحس- او وانت قاصد - بتديني احلى احساس بتعيشه اي ست بعد عشق زوجها ليها
بعدما شفت وحسيت ودقت جمال الامومة بطلب من ربنا يحرسك ويحميك ويحمي ولاد المسلمين.. ويرد يوسف لحضن فاتيما ويعوض انسانة بقرة عين لها ولزوجها.. قولوا امين
امضاء: ماما بوبو

بيكا.. توضيح لابد منه

انا اسف جدا.. بقالي كتير اوي مكتبتش هنا ، بس هعمل ايه في ماما؟ مشغولة ومش فاضية تيجي تحكي.. معلش بكرة اكبر واتعلم اكتب لوحدي
النهاردة مش هحكي مغامرة جديدة ولا حاجة.. هوضح ليه بابا بيناديني باسم بيكا اللي انا بحبه جدا
اول ما اتولدت بابا مكانش عارف يخترعلي اسم تدليل.. ماما كانت بتناديني بحاجات كتير.. منها مثلا : عمري - عموري - مرموري - موري - حبيب ماما - البي ، وحاجات كدة من بتاعت الامهات ، بس بابا مكانش مقتنع اوي بالتدليل دا ، لحد ما بدا يلاعبني لعبة كنت بحبها اوي - اصلي بحب اي حاجة بابا يعملهالي - واللعبة دي كانت انه يحدفني لفوق - بس بالراحة عشان كنت صغنن اوي - ويقولي : تيكا تيكا تيكا وانا اضحك واتبسط جدا ، وبعدين بدات كلمة تيكا تيكا تيكا دي تتحرف لشيكا شيكا بيكا ، وبرضه افضل اضحك ، ولما ماما بدات تغني قدامي اغنية شيكا بيكا وبولوتيكا ومقالب انتيكة انتبهت وحبيت الاغنية جدا ، وبابا بذكائه اخد باله ان اي كلمة فيها حرف الكاف والالف بتشد انتباهي فبقت دي اغنيتي المفضلة اللي بيغنوهالي ومنها بابا ابتدا يغنيلي : ولا تزعل ولا تحزن اضحك برضه يا بيكا (بدل ويكا)، وبقى اسم التدليل بتاعي هو بيكا
ماما في الاول مكانتش حابة ان الاسم دا يلزق فيا كدة ، بس بعدين استسلمت وبقت هي كمان تندهني بيه .. وانا بحبه جدا ، وعلى فكرة دا كانت تاني كلمة نطقتها ف حياتي بعد كلمة بابا ، ونطقتها واضحة ومتفسرة زي ما بابا بيقولهالي بالظبط ، ودلوقت بابا بيالفلي عليها اغاني ، زي مثلا :
بيكا بيكا بيكا.. كلنا كدة عاوزين بيكا .. بيكا بيكا بيكا.. لا ف روسيا ولا ف امريكا ، ودي على نفس لحن اغنية صورة
حكاية طويلة.. مش كدة؟

الاول

اول مغامرة كانت وانا لسه جوة بطن ماما.. كنت بفضل طول الليل العب كورة.. اصلي بحب الكورة اوي ، وكنت بحس بماما وهي بتكلمني وتقولي: نام يا عمر ربنا يهديك مش وقت لعب يا حبيبي.. بس انا بصراحة مكنتش بسمع الكلام
لما خرجت من بطن ماما فضلت برضه احب الكورة ، وعشان كدة عندي كورة في البيت وكورة بتاعتي سايبها عند تيتاه مامت ماما ، وكورة في الحضانة ، وهنشتري كورة نسيبها عند تيتاه مامت بابا
شفتو بحب لعب الكورة ازاي؟