السبت، 24 أبريل، 2010

الولد الشقي


هل انا طفل شقي وبعمل شقاوات وازاعيج لماما؟ هحكيلكم على حركاتي وانتو احكمو بنفسكو لان ماما دايما تظلمني وتقول عني شقي
يعني لما الاقي ماما قاعدة قدام الكمبيوتر بتقرا او بتلعب ، واجيب الكورة ارميها على الكيبورد ، ابقى انا شقي؟
طيب لما تكون ماما عاوزة تنام وانا افضل انط فوقها وازغزغها عشان تصحى تلعب معايا ابقى انا شقي؟
ولما اجيب لعبي من اوضة اللعب بتاعتي وارميها ف كل مكان في الشقة ، ماما بتفضل تقولي كدة عيب يا بيكا.. اللعب يا حبيبي مكانها اوضة اللعب .. بس انا بصراحة مبسمعش الكلام.. ابقى انا شقي؟
ماما امبارح نسيت باب اوضة المكتب مفتوح ، وانا استغليت الفرصة وطلعت على كرسي الكمبيوتر وقفشتني وانا بخبط الكيبورد بمفك بابا بيحطه جنب الكمبيوتر.. تفتكروا انا كدة شقي؟
كمان بدخل تحت الترابيزة واستخبى عشان اخض ماما وهي مش لقياني ، وساعات اول ما باب المطبخ يتفتح اجري على جوة اجيب طاسة تيفال وعلب التلاجة وافضل العب بيهم واخبطهم في الارض.. وبرضه ماما تقول عني شقي

واخيرا لما تعملي نعناع وتحطه في الكوباية بتاعتي وانا اعمل نفسي بشربه بس انا في الحقيقة بلعب وادلقه على لبسي وماما تضطر تغيرلي عشان مبردش.. بصراحة.. انا مش شايف اني شقي خاااااااااااااص.. وانتو.. رايكو ايه؟

1 شجعوني:

  1. شقى ؟!!!

    مين الى قال كدا ؟؟

    و لا فيه شقاوة
    و لا إجرام
    و لا عفرتة
    و لا حاجة من دى
    خاااااااالث بالمرة

    دنتا آخر هداوة
    و شياكة أهو
    ملااااك يا ناس
    براءة ع الآخررررر



    بس تعالى هنا قولى
    بينى و بينك


    بالمفك يا مفتررررررى



    طب يا واد سيبلنا الكمبيوتر سليم
    عشان بابا و ماما يكتبولنا عليه حاجات حلوة
    و نعرف احنا نكلمهم
    و نطمن عليكم
    و نقرى حواديتك الطعامة لما
    نيجى مدونتك الحلوة زيك قوى خالص دى
    و لو سمحت متلعبش بالمفك دا لأنه خطر
    ممكن؟


    اما علب التلاجة والطاسة
    و الأستغماية مع ماما
    أنا دلوقتى عرفت هبة بوبو بتخس ليه؟؟
    من كتر الجرى وراك يا مجرم
    و لم اللعب و تغيير الهدوم و الأفلام دى كلها
    يا خرااااااااااشى عليك
    منكن براحة على ماما و نريحها شوية ..
    مكنن لو سمحت

    و لا كأنك سمعت حاجة ..صح ؟؟


    طيييييييب

    عموماااااااا


    ربنا يا حبيبى
    يخليك لماما و بابا
    و لكل اللى بيحبوك
    و شقاواتك دى على قلبهم و قلبنا زى العسل



    تعيش و تتشاقى يا حبيبى
    بوساااااااااات و حضونات
    قد كدا عشانك
    يا شيكا بيكا
    يا حبيب طنطتك فاتيما

    ردحذف