Slide Title 1

Aenean quis facilisis massa. Cras justo odio, scelerisque nec dignissim quis, cursus a odio. Duis ut dui vel purus aliquet tristique.

Slide Title 2

Morbi quis tellus eu turpis lacinia pharetra non eget lectus. Vestibulum ante ipsum primis in faucibus orci luctus et ultrices posuere cubilia Curae; Donec.

Slide Title 3

In ornare lacus sit amet est aliquet ac tincidunt tellus semper. Pellentesque habitant morbi tristique senectus et netus et malesuada fames ac turpis egestas.

الثلاثاء، 27 مارس، 2012

انا كبرت :)






وبمووووووووووووووت في القطط


ويا ريت محدش يسالني مين عمو اللي بيرسمني دا؟ اهو واحد وخلاص.. المهم انا

الخميس، 24 مارس، 2011

بحبك يا ماما

عندي ثلاث سنين

وثلاث شهور

وثلاث أعياد أم عدوا عليا و أنا هنا في الدنيا

ولكن دي أول سنة أعرف أقول لماما كل سنة و إنتي طيبة

بابا قالي قول لماما كده علشان عيد الأم

أنا بأحب ماما أوي

وكمان بابا بيحبها أوي

الحقيقة كل الناس بتحبها أوي

ماشفتش اي حد مش بيحب ماما

يمكن علشان هي أجمل إنسانة في الكون

ويمكن علشان هي أرق مخلوقة على وجه الأرض

ويمكن علشان هي اطيب حد في الدنيا

ايوة .. هي كل ده

داانا باعمل فيها عمايل ،، بس هي مش بتزعل مني

ولا بتغضب خالص

بالعكس .. بتضحك و تلعب معايا أكتر من بابا بكتييييييير

أصل بابا غالبا مشغول و مش فاضي

بس أنا بأحبه هو كمان أوي

وهو كمان بيحبني أنا و ماما أوي أوي أوي

أنا بجد أقدر أقول إني أسعد طفل في العالم

لأن عندي ماما دي

ربنا يخليها لي و مايحرمنيش منها أبدا

وتفضل تلعب معايا و نعمل أنا و هي شقاوات كتيييير

كل سنة و إنتي طيبة

كل سنة و إنتي ماما


الأربعاء، 2 يونيو، 2010

السبت، 24 أبريل، 2010

الولد الشقي


هل انا طفل شقي وبعمل شقاوات وازاعيج لماما؟ هحكيلكم على حركاتي وانتو احكمو بنفسكو لان ماما دايما تظلمني وتقول عني شقي
يعني لما الاقي ماما قاعدة قدام الكمبيوتر بتقرا او بتلعب ، واجيب الكورة ارميها على الكيبورد ، ابقى انا شقي؟
طيب لما تكون ماما عاوزة تنام وانا افضل انط فوقها وازغزغها عشان تصحى تلعب معايا ابقى انا شقي؟
ولما اجيب لعبي من اوضة اللعب بتاعتي وارميها ف كل مكان في الشقة ، ماما بتفضل تقولي كدة عيب يا بيكا.. اللعب يا حبيبي مكانها اوضة اللعب .. بس انا بصراحة مبسمعش الكلام.. ابقى انا شقي؟
ماما امبارح نسيت باب اوضة المكتب مفتوح ، وانا استغليت الفرصة وطلعت على كرسي الكمبيوتر وقفشتني وانا بخبط الكيبورد بمفك بابا بيحطه جنب الكمبيوتر.. تفتكروا انا كدة شقي؟
كمان بدخل تحت الترابيزة واستخبى عشان اخض ماما وهي مش لقياني ، وساعات اول ما باب المطبخ يتفتح اجري على جوة اجيب طاسة تيفال وعلب التلاجة وافضل العب بيهم واخبطهم في الارض.. وبرضه ماما تقول عني شقي

واخيرا لما تعملي نعناع وتحطه في الكوباية بتاعتي وانا اعمل نفسي بشربه بس انا في الحقيقة بلعب وادلقه على لبسي وماما تضطر تغيرلي عشان مبردش.. بصراحة.. انا مش شايف اني شقي خاااااااااااااص.. وانتو.. رايكو ايه؟

الخميس، 25 مارس، 2010

أجمل حد في الدنيا


ماما ، أجمل حد في الدنيا ، العيد بتاعها كان من كام يوم ، بس أنا ماكنتش أعرف ، بابا أكيد جاب لها هدية حلوة ، بس أنا ماجبتش حاجة علشان أنا لسه صغير ومش بأعرف أشتري أي حاجة ، بس الهدية بتاعت بابا أكيد هو قال لها إنها بتاعتي، وقدمها لها بإسمي ، أيوة ، أصل بابا دايما بيعمل لي الحاجات إللي مش بأعرف أعملها لسه علشان أنا طفل صغير ، زي أنه يكتب لي البوست ده مثلا ، نرجع بقى لماما ، أنا بأحبها قوي قوي قوي ، هي فاكرة إني بأحب بابا أكتر ، بس في الحقيقة لأ ، أنا صحيح بأتفق مع بابا عليها كتير ، بس ده لأني بأحس إن بيني و بين بابا حاجات مشتركة كتير قوي ، لكن مشاعري من جوة ، ماما فيها نمرة واحد ، وساعات بأتغاظ من بابا جدا لما بأحس إن ماما مهتمه بيه أكتر مني ، هي أول حد بأفكر فيه لما بأفتح عنيا الصبح ، وهي آخر حد بأفكر فيه قبل ما أنام ، وطول الوقت بأحاول أكون جنبها و في حضنها ، ماعدا الوقت بتاع الأكل و الوقت بتاع الدوا ، في الوقتين دول بأهرب منها ، وهي تجري و رايا و تضحك ، آه نسيت ، وكمان وقت البامبرز إحم إحم ، هي بتقول إني مجننها ، بس هي مبسوطة بالشقاوات دي ، المهم إنها مبسوطة ، وأنا فكرت إني أكتب لها البوست ده علشان أقول لها كل سنة و إنتي طيبة يا أحلى و أجمل و أحن أم في الدنيا ، ربنا يخليكي لينا أنا و بابا

السبت، 6 فبراير، 2010

مفيش مغامرات النهاردة


وحشتني يا بابا.. انت هتيجي امتى؟ من ساعة ما مشيت وانا نايم.. خايف اصحى احس بغيابك.. بقالك يوم ونص مش موجود.. انا بحب العب كورة معاك اكتر من ماما.. انا بحب ماما بس بحس ان اللعب معاك احلى وله طعم تاني.. وبحب اوي لما ترميني للسقف.. وبحبك اوي لما تحب تشاكس ماما وتغير كلام الاغنية اللي هي بتغنيها معايا ، وبدل

twinkle twinkle little star

تخليها انت

uncle uncle don't cry

وماما تتغاظ وتقولك يا وليد بلاش تعلمه الكلام غلط .. وانت تضحك وتغنيهالي غلط من وراها .. وبحب اقعد جنبك في العربية واربط حزام الامان وانت جايبني من الحضانة .. بحس انك معتبرني راجل وكبير ومن حقي اقعد جنبك.. هتيجي امتى عشان اصحى استناك ؟

الخميس، 31 ديسمبر، 2009

يوم ما اتولدت

كنت بتفرج مع بابا على التليفزيون.. نام على كنبة الانتريه قصادي الساعة 12 نص الليل.. فضلت اتامل ف ملامحه زي ما بحب اعمل دايما ، ونقحت عليا الكتابة ليه.. اصلي من وقت للتاني احب اكتبله جواب كاننا اتنين عشاق من بتوع زمان.. احنا فعلا اتنين عشاق بس من بتوع كل زمان.. وانا بكتب في الجواب صحي وقالي انه هيدخل يفرد ضهره على السرير ، قلتله وانا هتفرج على الفيلم الاجنبي واحصلك.. الساعة 1 بعد نص الليل دخلت السرير وانا حاسة بوجع ف ضهري.. كنت متاكدة اني هولد النهاردة مش عارفة ليه.. دخلت نمت كأن واحدة غيري هي اللي بتتالم.. كان لسه نقح مش خبط جامد.. قلت لنفسي يمكن لو نمت وعملت نفسي مش واخدة بالي من الوجع مولدش.. اصلي كنت دايما اقول لبابا اني مش عاوزة اولد ف وقت متاخر عشان هكون اكيد عاوزة انام والوجع والولادة هيمنعوني من النوم.. نمت نوم متقطع واقرب للصحيان منه للنوم والساعة 3 بعد نص الليل مقدرتش استحمل ولا استعبط واعمل كأني مش انا اللي بتوجع.. شفت علامة الولادة.. بكل هدوء كلمت ماما قلتلها.. قالتلي كلمي الدكتورة.. كلمت الدكتورة قالتلي لسه بدري.. قدامك على الاقل لحد 10 الصبح تبقي تروحي المستشفى وانا هحصلك.. دخلت السرير احاول انام بس الوجع مرحمنيش.. ورا بعضه ورا بعضه مش مديني فرصة اخد نفسي.. صحيت بابا وقلتله بكل هدوء: انا بولد.. قام مفزوع .. كلمت الدكتورة تاني وقلتلها الوجع مفيش بينه وبين بعضه غير ثواني.. قالتلي اجري على المستشفى.. كنا في المستشفى 4:30 الصبح.. دخلوني اوضة العمليات على اساس هولد طبيعي.. وصلت الدكتورة وكشفت عليا جوة الاوضة وقالتي لا.. قيصري.. قلتلها اي حاجة بس اخلص من الوجع دا.. كان نازل عليا هدوء غريب وقوة غريبة ف تحمل الالم ، وانا اللي مبستحملش شكة الدبوس.. بس انا فيا حاجة غريبة.. لما بيكون الشيء قدر ومفيش منه مفر بستسلم لقضاء ربنا وانا مؤمنة انه الخير.. ادوني البنج غبت عن الحياة وفقت بردانة والدنيا مهزوزة قدامي ولمحت من بين الضباب وش بابا بيبتسم.. سالته: حبيبي .. الولد عامل ايه؟ قالي : قمر.. قلتله : سليم؟ قالي الحمد لله طفل معافى.. غبت تاني عن الحياة ولما فقت قلت اني عاوزة اشوفه.. جابولي ولد شبه بباه جدا .. قلت ف بالي: ايييييه داااااااااا؟ هي البقعة الحمرا اللي ف مناخيره دي هتفضل كدة على طول ولا ايه؟



وخدت الولد الجميل ف حضني
ولما بصيتله دلوقت بعد ميلاده بسنتين وهورايح ف النوم ف حضني مصدقتش ان الولد الجميل دا ابني .. مصدقتش ان ربنا بيحبني اوي كدة.. حمدت ربنا انه انعم عليا بالذرية وتمنيت تكون ذرية صالحة
الولد الجميل اللي كان ببقعة حمرا ف مناخيره هو انت يا عمري.. والبقعة الحمرا اللي اتولدت بيها راحت.. سنتين عدوا وانت ف حضن ماما وبابا.. انت نور عنينا وابتسامتك هي ضحكة الدنيا لينا.. كل الوجع اللي حسيته ف حملك وولادتك بحس انه تمن قليل اوي ادفعه قصاد طفل جميل زيك.. نظرة عنيك وكلمة ماما عندي بالدنيا.. مش انا بس اللي بديك حب وحنية ودفا.. انت كمان من غير ما تحس- او وانت قاصد - بتديني احلى احساس بتعيشه اي ست بعد عشق زوجها ليها
بعدما شفت وحسيت ودقت جمال الامومة بطلب من ربنا يحرسك ويحميك ويحمي ولاد المسلمين.. ويرد يوسف لحضن فاتيما ويعوض انسانة بقرة عين لها ولزوجها.. قولوا امين
امضاء: ماما بوبو