الخميس، 25 مارس، 2010

أجمل حد في الدنيا


ماما ، أجمل حد في الدنيا ، العيد بتاعها كان من كام يوم ، بس أنا ماكنتش أعرف ، بابا أكيد جاب لها هدية حلوة ، بس أنا ماجبتش حاجة علشان أنا لسه صغير ومش بأعرف أشتري أي حاجة ، بس الهدية بتاعت بابا أكيد هو قال لها إنها بتاعتي، وقدمها لها بإسمي ، أيوة ، أصل بابا دايما بيعمل لي الحاجات إللي مش بأعرف أعملها لسه علشان أنا طفل صغير ، زي أنه يكتب لي البوست ده مثلا ، نرجع بقى لماما ، أنا بأحبها قوي قوي قوي ، هي فاكرة إني بأحب بابا أكتر ، بس في الحقيقة لأ ، أنا صحيح بأتفق مع بابا عليها كتير ، بس ده لأني بأحس إن بيني و بين بابا حاجات مشتركة كتير قوي ، لكن مشاعري من جوة ، ماما فيها نمرة واحد ، وساعات بأتغاظ من بابا جدا لما بأحس إن ماما مهتمه بيه أكتر مني ، هي أول حد بأفكر فيه لما بأفتح عنيا الصبح ، وهي آخر حد بأفكر فيه قبل ما أنام ، وطول الوقت بأحاول أكون جنبها و في حضنها ، ماعدا الوقت بتاع الأكل و الوقت بتاع الدوا ، في الوقتين دول بأهرب منها ، وهي تجري و رايا و تضحك ، آه نسيت ، وكمان وقت البامبرز إحم إحم ، هي بتقول إني مجننها ، بس هي مبسوطة بالشقاوات دي ، المهم إنها مبسوطة ، وأنا فكرت إني أكتب لها البوست ده علشان أقول لها كل سنة و إنتي طيبة يا أحلى و أجمل و أحن أم في الدنيا ، ربنا يخليكي لينا أنا و بابا

2 شجعوني:

  1. انا معاك يا بيكاااااااا

    بقول لماما كل سنة و هيا طيبة و اجمل و احن و اطيب الأمهات
    و حاجة كمان
    مامتك رومانسية قوى يا واد يا عمر

    يعنى ايه الكلمة دى ؟؟

    رومانسية دى يعنى ست حنينة
    و حبوبة
    و بتحب بابا قووووووووووى

    مش كل ماما عند صحابك
    هتلاقيها بتحب باباه كدا
    انتا عندك حاجة مش عند حد
    خلى بالك قوى يعنى تتفشخر كدا
    و محدش قدك

    ربنا يخليلك ماما و بابا
    و يخليكم انتوا التلاتة لبعض
    و لينا و لكل اللى بيحبوكم زينا

    و خلاص بقى احنا مش المفروض نبطل البامبرز دا بقى ؟!!

    بوسات و حضونات لحد ما اشوفك يا حبيبى
    يا شيكا بيكا
    بس من غير مقالب أنتيكا و النبى
    أمووووا عشان مبعرفش اديهالك بجد
    بتنكسف و تعمل حركات و تتقل و كدا

    ردحذف
  2. ربنا يخلي لك ماما وبابا يارب طول العمر ويخليك ليها
    وتبقى الابن اللى تتمنى تشوفه وتفتخر بيه

    و دايما تسمع كلامها مش تزعلها ولا تتعبها

    ردحذف