الخميس، 31 ديسمبر 2009

يوم ما اتولدت

كنت بتفرج مع بابا على التليفزيون.. نام على كنبة الانتريه قصادي الساعة 12 نص الليل.. فضلت اتامل ف ملامحه زي ما بحب اعمل دايما ، ونقحت عليا الكتابة ليه.. اصلي من وقت للتاني احب اكتبله جواب كاننا اتنين عشاق من بتوع زمان.. احنا فعلا اتنين عشاق بس من بتوع كل زمان.. وانا بكتب في الجواب صحي وقالي انه هيدخل يفرد ضهره على السرير ، قلتله وانا هتفرج على الفيلم الاجنبي واحصلك.. الساعة 1 بعد نص الليل دخلت السرير وانا حاسة بوجع ف ضهري.. كنت متاكدة اني هولد النهاردة مش عارفة ليه.. دخلت نمت كأن واحدة غيري هي اللي بتتالم.. كان لسه نقح مش خبط جامد.. قلت لنفسي يمكن لو نمت وعملت نفسي مش واخدة بالي من الوجع مولدش.. اصلي كنت دايما اقول لبابا اني مش عاوزة اولد ف وقت متاخر عشان هكون اكيد عاوزة انام والوجع والولادة هيمنعوني من النوم.. نمت نوم متقطع واقرب للصحيان منه للنوم والساعة 3 بعد نص الليل مقدرتش استحمل ولا استعبط واعمل كأني مش انا اللي بتوجع.. شفت علامة الولادة.. بكل هدوء كلمت ماما قلتلها.. قالتلي كلمي الدكتورة.. كلمت الدكتورة قالتلي لسه بدري.. قدامك على الاقل لحد 10 الصبح تبقي تروحي المستشفى وانا هحصلك.. دخلت السرير احاول انام بس الوجع مرحمنيش.. ورا بعضه ورا بعضه مش مديني فرصة اخد نفسي.. صحيت بابا وقلتله بكل هدوء: انا بولد.. قام مفزوع .. كلمت الدكتورة تاني وقلتلها الوجع مفيش بينه وبين بعضه غير ثواني.. قالتلي اجري على المستشفى.. كنا في المستشفى 4:30 الصبح.. دخلوني اوضة العمليات على اساس هولد طبيعي.. وصلت الدكتورة وكشفت عليا جوة الاوضة وقالتي لا.. قيصري.. قلتلها اي حاجة بس اخلص من الوجع دا.. كان نازل عليا هدوء غريب وقوة غريبة ف تحمل الالم ، وانا اللي مبستحملش شكة الدبوس.. بس انا فيا حاجة غريبة.. لما بيكون الشيء قدر ومفيش منه مفر بستسلم لقضاء ربنا وانا مؤمنة انه الخير.. ادوني البنج غبت عن الحياة وفقت بردانة والدنيا مهزوزة قدامي ولمحت من بين الضباب وش بابا بيبتسم.. سالته: حبيبي .. الولد عامل ايه؟ قالي : قمر.. قلتله : سليم؟ قالي الحمد لله طفل معافى.. غبت تاني عن الحياة ولما فقت قلت اني عاوزة اشوفه.. جابولي ولد شبه بباه جدا .. قلت ف بالي: ايييييه داااااااااا؟ هي البقعة الحمرا اللي ف مناخيره دي هتفضل كدة على طول ولا ايه؟



وخدت الولد الجميل ف حضني
ولما بصيتله دلوقت بعد ميلاده بسنتين وهورايح ف النوم ف حضني مصدقتش ان الولد الجميل دا ابني .. مصدقتش ان ربنا بيحبني اوي كدة.. حمدت ربنا انه انعم عليا بالذرية وتمنيت تكون ذرية صالحة
الولد الجميل اللي كان ببقعة حمرا ف مناخيره هو انت يا عمري.. والبقعة الحمرا اللي اتولدت بيها راحت.. سنتين عدوا وانت ف حضن ماما وبابا.. انت نور عنينا وابتسامتك هي ضحكة الدنيا لينا.. كل الوجع اللي حسيته ف حملك وولادتك بحس انه تمن قليل اوي ادفعه قصاد طفل جميل زيك.. نظرة عنيك وكلمة ماما عندي بالدنيا.. مش انا بس اللي بديك حب وحنية ودفا.. انت كمان من غير ما تحس- او وانت قاصد - بتديني احلى احساس بتعيشه اي ست بعد عشق زوجها ليها
بعدما شفت وحسيت ودقت جمال الامومة بطلب من ربنا يحرسك ويحميك ويحمي ولاد المسلمين.. ويرد يوسف لحضن فاتيما ويعوض انسانة بقرة عين لها ولزوجها.. قولوا امين
امضاء: ماما بوبو


10 شجعوني:

  1. تصدقى لسة فاكرة كل التفاصيل دى من اول ما كنتوا بتكتبوا عندكم أنتى ووليد انك حامل وفى انتظار المولود ولحد ما ولدتى لدرجة أنى لما نزلت موضوع عندى عنه وليد قالى أنى الراعى الرسمى لعمر

    وفعلا انا كده ولا انتى عندك ماااااااانع
    :)))))

    وفاكرة قوووووووووى لما جيتوا ليا وكان عمر لسة ماكملش شهر وقضاها نوووووم لحد ما روحتوا

    وكان نفسى أقولك سيبيه معايا لانى بحب الاطفال قووووووووى

    ذكريات جميلة قوى وخلتينى أحس أنى كنت معاكى

    وتقريبا أنا برضة الراعى الرسمى لولاد كل قرايبى لأنى ببقى معاهم وهما بيولدوا

    أمال بقيت خالتو وعمتو على الفاضى

    هههههههههههههههههههههههههههههه

    ربنا يكرمك يارب أنتى ووليد وتجيبوا أخوات كتييييييرة لعمر وبرضة هبقى الراعى الرسمى ليهم

    ردحذف
  2. شفت بقى يا عمر مش قلت لك أنى الراعى الرسمى وأول تعليق كمان

    راعى رسمى بجد

    :)))))))))))

    ردحذف
  3. يا عمر عايزاك تقول لماما بلاش كلامها الغريب اللى بتقوله ده وبعدين هيا أكتر واحدة عارفة غلاوتها عندى وأنها من حقها تعلق وتكتب وتقول اللى عايزاه فى أى وقت ومفيش حاجة بينا أسمها تطفل

    قول لماما عيب الكلام ده خالتو بوسبوس بعد كده هتحط السيخ المحمى فى صرصور ودنك

    ومستنياكم تيجوا أى وقت وتشرفونى تانى ولا ما بقيتوش عايزين تشوفونى


    :))))))

    ردحذف
  4. كل سنة وانت طيب يا عمر
    بحبك قوي
    رغم اني شفتك دقائق نونو
    لكن انت وماما تدخلوا القلب من غير اي كلام
    هي بنظرتها الصافية
    وانت بالضحكة اللي تجنن اللي ضحكتها لي
    ربنا يهنيك
    ويجعلك فخر لأمة الإسلام
    وقرة عين لبابا وماما

    فين التورتة يا بنتي
    مش رسم وصور
    انا مليش في الكلام ده
    انا عاوزة تورتة ملفاي حقيقي :)

    ردحذف
  5. ;كل سنة وهو وانتى وباباه بالف خير
    انا بحب اسم عمر قوى
    ربنا يخليه ليكى
    وتفرحى باخوات كثير ليه باذن الله

    ردحذف
  6. كل سنة و إنت طيب
    يا حبيبى
    انا مش عارفة
    أقول حاجة خالص

    و ساعات المواقف الكبييييييرة
    بتخلى الواحد ساكت كدا و مش لاقى كلام

    أصل إنتا مش طفل عادى
    زى بقية العيال

    انت يا حبيبى
    طفل معجزة
    أيوه

    إسال ماما و بابا كدا
    و هما يقولوك
    إنك جيت بعد قصة حب كبيييييرة
    و جوازة كلها خير
    و بركة
    و تفاهم
    مش عادى ..الله أكبر مش بحسد
    دنا فرحانة بالحالة النادرة دى

    انا لما بشوف ماما و بابا سوا
    بحس إن الدنيا بخير
    و إن ممكن إتنين يتقابلوا
    و يحبوا بعض
    و يتجوزوا
    و يبقى كل حاجة احلى من الاول
    و ربنا يبقى مبارك فيها
    لأنهم ناس كويسين قوى
    و بيحبوا بعض قوى
    و عاوزين يسعدوا
    بعض قوى


    و عشان ربنا أصله مطلع
    و عارف القلوب و اللى فيها
    من صدق
    فكرمهم بيك
    عشان فرحتهم تكمل و تكبر
    و تبقى إنتا يا عمورة
    معنى الحب الكبير
    و صورته المتشافة لينا كلنا


    مش هقولك بابا و ماما
    بيحبوك ازاى
    و لا ممتنين لربنا
    بنعمة وجودك إزاى
    إنت اكيد حاسس
    بكل حضن من ماما
    و بوسة من بابا


    انا بس هقولك
    ربنا يحرسك
    و يسعدك
    و يحلى كل أيامك
    و يخليك لبابا و ماما يا حبيبى


    و لينا كلنا


    انا كنت برد ع الموبايلات صحيح
    وملحقتش أقعد أغنى
    قصاد التورتة امبارح
    بس انا كلت منها
    و كانت حلوة زيك
    ماما جابتها بالشكولاتة
    و قالتلى إنتى بتحبيها بالشكولاتة
    انتى و خيخة
    شوفت ماما حنينة أزاى
    و جميلة


    عقبال يا حبيبى كل سنة
    لما نتجمع
    و نحتفل بعيد ميلادك
    و كل سنة نشوفك بتكبر
    و تحلو زيادة
    و تنور الدنيا بضحكتك الحلوة

    بحبك يا واد إنتا قوى
    و بحب ماما قوى
    و بعز بابا قوى

    و ربنا يسعدك يا حبيبى
    قوى
    قوى
    قوى

    ردحذف
  7. طنط بوسبوس
    طبعا يا طنط حضرتك الراعي الرسمي وغير الرسمي ليا ومن غير مبالغة انا وماما وبابا بنعتبرك خالتي وعمتي .. بس يا طنط مش خالتي وعمتي المفروض تبقى يعني عاوزة تشوفني ولا تختفي كدة على طول؟
    ماما حكتلي لما جابتني ميت غمر وانا لسه يا دوب عندي شهر وقالتلي اني فضلت نايم طول الوقت وان طنط بدورة كانت بتعمل دوشة عشان تصحيني وانا مرضتش اصحى.. وحشتوني والله يا طنط
    كل سنة وحضرتك طيبة

    ردحذف
  8. طنط ستيتة حبيبتي وحبيبة ماما
    والله يا طنط ماما حبت حضرتك من قبل متشوفك وانا وقعت ف غرامك فورا وعشان كدة اديتك ابتسامة ساحرة وبوسة مبتطلعش لاي حد غير الغاليين
    لو حضرتك كنتي جيتي الاجتماع الحريمي اللي ماما راحته امبارح واخدتني معاها كنتي اكلتي معانا تورتة واحتفلتي بيا بس معلش لما نشوف حضرتك في اقرب فرصة التورتة تبقى تحت امرك..وبالملفاي كمان
    ميرسي يا طنط على الدعوات الجميلة دي.. ولكي مثلها باذن الله

    ردحذف
  9. طنط ام مالك
    وحضرتك طيبة يا طنط.. انا اللي برد على التعليقات مش ماما .. انا سبتها بس تدخل تكتب البوست دا عشان عيد ميلادي انما دا المقر السري لمغامراتي ومن هنا بقول لحضرتك: وانا بحب حضرتك لان ماما دايما تدعيلك بالصحة.. ميرسي يا طنط على ذوقك

    ردحذف
  10. طنط فاتيما الغالية مامت الغالي على راي ماما
    والله يا طنط انا مبعرفش ارد على كلام حضرتك من كتر ما هو ذوق ورقيق وحلو كدة ويدخل القلب على طول
    انا بس زعلت من حضرتك امبارح عشان ملحقناش نقعد معاكي كتير من كتر التليفونات بس كفاية اننا شفناكي
    والف هنا وشفا التورتاية.. دا حضرتك متعرفيش حبك في بيتنا اد ايه واسمك واسم يوسف بيتردد على لسان ماما وبابا اد ايه.. يعني حضرتك باختصار كدة محبوبة هذا المنزل
    ربنا ميحرمناش منك يا طنط ابدا

    ردحذف