وحشتني يا بابا.. انت هتيجي امتى؟ من ساعة ما مشيت وانا نايم.. خايف اصحى احس بغيابك.. بقالك يوم ونص مش موجود.. انا بحب العب كورة معاك اكتر من ماما.. انا بحب ماما بس بحس ان اللعب معاك احلى وله طعم تاني.. وبحب اوي لما ترميني للسقف.. وبحبك اوي لما تحب تشاكس ماما وتغير كلام الاغنية اللي هي بتغنيها معايا ، وبدل
twinkle twinkle little star
تخليها انت
uncle uncle don't cry
وماما تتغاظ وتقولك يا وليد بلاش تعلمه الكلام غلط .. وانت تضحك وتغنيهالي غلط من وراها .. وبحب اقعد جنبك في العربية واربط حزام الامان وانت جايبني من الحضانة .. بحس انك معتبرني راجل وكبير ومن حقي اقعد جنبك.. هتيجي امتى عشان اصحى استناك ؟
